Higa

Iruñetik Loitiko gainera doan errepidean eskubitara ikusten den mendia da, errepideaz tontorreraino ebakia. Tontorrean telebista emisore erraldoi bat, tontor guztia hartuz eta burdinazko sareaz inguratuta: ezin da 'tontorra' zapaldu, ez dago eta. Horiei ezikusiarena eginez gero, mendi ederra da Higa, piramide baten itxurakoa, basatia eta ikuspegi zabalekoa.
Monreal aldeko errepidearen ebakia ez ikustearren, mendia Ekialdetik nahiz Mendebaldetik inguratu eta hegoaldetik igotzen saia zaitezkete, baina erne, igoera zaila da eta: bidea ezpel artean gora igotzen da eta oso bihurria da. Tontorrera gerturatu ahala aldapa zutitzen doa eta azken txanpan harriari heldu behar zaio aurrera egiteko. Tarte batzuetan kateak jarrita daude, baina arretaz ibili beharra dago. Arrastoa galduz gero, akabo.