Kapildui

Baso, karaitz, txillar, ipuru, larre eta abereek osatzen dute mendi honen ingurune bakartia eta ibilbide luzeak egiteko parada egokia eskaintzen du, gorabehera larregirik gabe, Arluzea aldetik esaterako, edota Okina aldetik. Gasteizko hegoaldean luzatzen duen mendi eremu zabaleko tontorrik garaiena da Kapilduirena eta horren ondorioz mendizale askoren arreta erakartzen du, baina horri zor dio tontorrean duen antena handia ere. Antenarekin batera, erpin geodesikoa eta buzoia. Ekialdean eta iparraldeko isurialdean, berriz, Ertzantzaren ariketa eremua hedatzen da, alanbre hesia eta sarrera galerazten duten letrero ugariz seinalatuta. Ingurune ederra da gainontzean, basatia eta ikusgarria.