Lindus

Bi estatuen arteko mugan egoteak (izenaren jatorria ere hortik datorkio seguraski) bere kaltea ekarri dio mendi honi, beste askori bezala: tontorra desitxuratuta dauka, gotorleku bihurtuta, lubakiz inguratua. Bertan elkartzen dira iparraldetik datozen bi mendikate luze Pirinioaren ardatzarekin, baina ez da horregatik ingurukoak baino altuagoa. Erdian egote horrek hainbat ibilbidetan sartuta igotzeko aukera ematen du, Girizu eta Mendixurirekin batera, Orreagatik abiatuta, edota Adartza eta Laurinagak osatzen duten kate luzeko tontor guztiekin batera, Hayra aldetik abiatuta (ibilbide luzea oso, joan-etorrikoa izatekotan, baina ederra). Ez du gainontzean tontorrak inongo zailtasunik. Hurbilbide azkarrena Ibañetatik abiatzen dena da: tarteka asfaltoz eta tarteka porlanez egindako pista zabal batek ia tontorreraino bertaraino eramango gaitu. Igoera politena Mendiaundi aldetik (Hegoaldetik) datorren gandorrekoa da.