Mortxe

Ollarango bailara ederra ekialdetik ixten duen hormaren gaina da Mortxe. Gandor hori da mendiaren alderdirik ikusgarriena, gainontzean larrerako mendia baita, aldapa leunekoa hegoalde eta ekialdeko isurialdeetan. Eta larre zabal horien beste muturrean Etxauriko haitza, parez pare, nahiko gertu eta gora-behera handirik egin gabe. Bien artetik behera dator azkenean hainbeste kilometrotan luzatzen den goi-larreen eremu amaigabea (Andia, Urbasa, Entzia...), Arakil ibaiaren azpira sartu arte. Iparraldeko gandorra zaila da lehenengo erdian, basatia eta bortitza, eta hobe da eskubi aldetik saihestea, baina igoera errazagoa da gorago, Ollo alderako ikuspegi ederra eskainiz. Gandor honetara hurbiltzeko modurik errazena Saldisetik abiatzea da.