Oteros

Metro gutxirengatik gailentzen da Oterosen tontorra goi-lautada karstiko honetan nabarmentzen diren muino apalen artean, baina ingurune berezi hau ezagutzeko aitzakia baino ez da berea, izan ere badira inguruan antzeko muino gehiago neke handirik gabe zapaldu daitezkeenak: Alto Concha esaterako HMan, haize errotek menderatua; Pititurri, Zuatzu-Kuartango gaineko ertzean, edota Pikatxo, hau ere ertzean, iparralderago, erpin geodesikoaz seinalatua.
Goien, karaitza, larre eta ipuruen gainean, haize errotak dira nagusi, gora-behera gutxiko eremu zabal batean sakabanatuta. Zailtasunik gabe ibil daiteke noranahi (kontuz lainoarekin), haizerrotetarako urratutako pista zabalak jarraituz nahiz larre zabalean barrena. Abere ugari ikus daiteke larrean, zaldiak eta behiak batik bat, eta bazter bat baino gehiagotan ikusiko duzue haientzako ura biltzen duten putzuak.
Mendiaren alderdi ikusgarriena mendebaldeko isurialdea da, izan ere han amildegi batek ebakitzen du mendia, hainbat kilometrotan luzatzen den harresi luzea osatuz eta ikuspegi zabala eskainiz mendebaldean zabaltzen den Kuartangoko bailara ederraren gainean.
Gain alde hori zeharkatu eta ezagutzeko ibilbide aproposena Zuatzu-Kuartangotik abiatu eta Azkarate mt.ra igotzea da, handik Oteros gaina zapaltzera joan eta ertzera itzulita, hari jarraituz, Ezako mt.raino heltzea: han aurkituko dugu atzera abiapuntura eramango gaituen beste pista zabal bat.